Фәрит Мөхәммәтшин "Парламент дәресе" республика конкурсларында җиңүчеләрне бүләкләде
Татарстанның 47 укучысы ТР Дәүләт Советы рәисе тапшырган бүләкләргә лаек булды.
(Казан, 20 декабрь, "Татар-информ"). Бүген ТР Дәүләт Советы Рәисе Фәрит Мөхәммәтшин " Парламент дәресе-2018" кысаларында узган республика конкурсларында җиңүчеләрне бүләкләде. Парламентка балалар рәсемнәре, иншалар, эссе, видеороликлар һәм проектлар конкурсларының сигез номинациясендә 47 җиңүче чакырылган иде, дип хәбәр итә ТР Дәүләт Советының матбугат хезмәте.
"Безнең мәктәп укучыларына парламент дәресе буларак хокукый белем бирүнең мондый формасы күптән инде республикада үзен танытты", - дип билгеләп үтте Мөхәммәтшин.
Парламент дәресе - ул яшь буынның хокукый культурасын камилләштерүгә юнәлдерелгән яңа тәрбия технологиясе, дип өстәде ТР Мәгариф һәм фән министры урынбасары Станислав Андреев. ТР Дәүләт Советы Рәисе урынбасары Римма Ратникова фикеренчә, парламент дәресе катнашучылар өчен үзенчәлекле социаль лифт булды. "Парламент дәресләрендә без дәреслекләр битләрендә булмаган белем бирәбез", - дип ассызыклады ул.
Быел парламент дәресе Татарстанның барлык мәктәпләрендә узды һәм "Парламент, җәмгыять һәм мин" темасына багышланды. Парламент дәресе кысаларында иҗади конкурслар узды. Республика этабында Татарстанның барлык районнарыннан 1-11 нче сыйныф укучылары катнашты.
