Фәрит Мөхәммәтшин Казанда үлеп калган чит ил сугышчылары хөрмәтенә чәчәкләр куйды
Җиңү көнендә чәчәкләр шулай ук Азат итүче Солдат һәйкәленә дә салынды.
(Казан, 9 май, “Татар-информ”). Бүген, Җиңү көнендә, Татарстан Республикасы Дәүләт Советы Рәисе Фәрит Мөхәммәтшин, парламент һәм Казан шәһәр Думасы депутатлары, Хисап палатасы әгъзалары, “Бердәм Россия” партиясе әгъзалары һәм җәмәгать оешмалары вәкилләре, Татарстан Республикасы Дәүләт Советы Аппараты хезмәткәрләре Азат итүче Солдат һәйкәленә, шулай ук сугыш вакытында Казан госпитальләрендә үлеп калган һәм Архангельский зиратында җирләнгән чит ил сугышчылары хөрмәтенә куелган истәлек билгесенә веноклар һәм чәчәкләр салдылар.
Чарада Россия һәм Татарстан гимннары яңгырады, залп бирелде, хәрби оркестр уйнады.
Шулай ук Фәрит Мөхәммәтшин һәм Дәүләт Советы депутатлары иртәнге якта “Аналар һәм тол хатыннар” монументына чәчәкләр салды, Җиңү парадында һәм "Үлемсез полк" йөрешендә катнашты.
