Сәясәт 15 апрель 2015 11:29

Фәрит Мөхәммәтшин: “Балкан дәүләтләренең барысы белән дә парламентара хезмәттәшлек дәрәҗәсен үстерергә кирәк”

Словения белән Татарстан парламентлары элемтәләрен ныгыту мәсьәләләре хакында сүз булды

Скопировать ссылку

(Казан, 15 апрель, “Татар-информ”). Кичә, 14 апрель көнне, ТР Дәүләт Советы Рәисе Фәрит Мөхәммәтшин, Словения Республикасына шәхси сәфәре кысаларында, РФның әлеге республикадагы гадәттән тыш һәм тулы вәкаләтле илчесе Доку Завгаев белән очрашты.

Очрашу илчелек инициативасы белән оештырылды. Аның барышында, Фәрит Мөхәммәтшин ТРның Словения бизнес-партнерлары белән сәүдә-икътисад, фәнни-техник, гуманитар өлкәләрдә хезмәттәшлегенә ярдәме өчен дипломатка рәхмәт белдерде.

Сөйләшү вакытында ТР Президенты вазыйфаларын вакытлыча башкаручы Рөстәм Миңнеханов җитәкчелегендә делегациянең узган елның декабрендә Словения Республикасына килгәч төзелгән килешүләрнең перспективалары, Татарстан һәм Словения ведомстволары арасында имзаланган меморандумнарның гамәлгә ашырылуы хакында да сүз алып барылды. Ике республиканың парламентлары элемтәләрен ныгыту мәсьәләләре хакында да фикер алышу булды.

Очрашу нәтиҗәләре хакында телефон аша хәбәр иткән Фәрит Мөхәммәтшин: “Безнең партнерларның — парламентарийлар, бизнесменнар, фән һәм җәмәгать эшлеклеләренең — Татарстан белән төбәк хезмәттәшлеген алга таба үстерергә кызыксынуы бар. Безгә Балкан дәүләтләренең барысы белән дә парламентара хезмәттәшлек дәрәҗәсен үстерергә кирәк”,- диде.

Бу хакта ТР закон чыгару органының җәмәгатьчелек һәм ММЧ белән үзара эшчәнлек бүлеге хәбәр итә.

Сәхифәләр

Фәрит Мөхәммәтшин: “Балкан дәүләтләренең барысы белән дә парламентара хезмәттәшлек дәрәҗәсен үстерергә кирәк”