Фәрит Мөхәммәтшин «Авторетроклуб-21» ретромашиналар хәрәкәтенә старт бирде
1930-1980 елларда чыккан ретро автомобильләр катнашындагы автотурнир 12-15 июньдә Россия көненә багышлап үткәреләчәк.
(Казан, 10 июнь, «Татар-информ»). ТР Дәүләт Советы Рәисе Фәрит Мөхәммәтшин «Авторетроклуб-21» ретромашиналар хәрәкәтенә старт бирде. Колонна «Медведь» раллиенда катнашу өчен Ярославль шәһәренә юл тотты. Бу хакта республика парламентының матбугат хезмәте хәбәр итә.
Россия көненә багышланган автомобиль турниры 12-15 июнь көннәрендә узачак.
«Медведь» раллиенда Ярославль, Переславль, Гаврилов-Ям, Казан һәм Мәскәүдән 1930-1980 елларда чыккан машиналар катнаша. Татарстанны 10 ретроавтомобиль тәкъдим итәчәк. Раллида катнашу өчен аларга 800 чакрым юл узарга туры киләчәк.
