Сәясәт 18 гыйнвар 2010 19:05

Ф.Мөхәммәтшин: “Алда торган халык санын алу буенча җитди аңлату эшләрен башларга кирәк”

Дәүләт Советы Рәисе фикеренчә, Россия Федерациясендә яшәүче төрле милләт вәкилләренең саны буенча мәгълүматлар җыюда дөреслектән тайпылмау халык исәбен алуда мөһим аспектлардан санала

Скопировать ссылку

(Казан, 18 гыйнвар, “Татар–информ”). Бүген республика парламентында ТР Дәүләт Советы Рәисе Фәрит Мөхәммәтшин катнашында 2010 елда Бөтенроссия халык санын алуны оештыру мәсьәләләренә багышланган киңәшмә узды, дип хәбәр итә ТР Дәүләт Советының матбугат хезмәте.
Киңәшмәдә әлеге чараны законнар белән ныгыту мәсьәләләре хакында фикер алышынды. Аның әһәмияте хакында сөйләгәндә, Фәрит Мөхәммәтшин инде хәзер үк җитди аңлату эшләрен башларга кирәк, дип ассызыклады.
“Халык санын алуның сроклары республикада муниципаль сайлаулар үткәрү вакыты белән туры килүен исәпкә алып, әлеге эшкә бүгеннән үк керешергә кирәк”, – дип билгеләп үтте ул.
Парламент башлыгының сүзләренә караганда, язгы сессиядә ТР Дәүләт Советының алда торган халык санын исәпкә алуга бәйле рәвештә Татарстан Республикасында административ–территориаль үзгәрешләрне туктату турында карар кабул ителәчәк. Дәүләт Советы Рәисе фикеренчә, Россия Федерациясендә яшәүче төрле милләт вәкилләренең саны буенча мәгълүматлар җыюда дөреслектән тайпылмау халык исәбен алуда мөһим аспектлардан санала.

Сәхифәләр

Ф.Мөхәммәтшин: “Алда торган халык санын алу буенча җитди аңлату эшләрен башларга кирәк”