Эльвира Әхмәтова: Төбәктә гаилә кыйммәтләре һәм күп балалы гаилә модасын күтәрү кирәк
Татарстан Республикасы Министрлар Кабинетының Гражданлык хәле актларын теркәү идарәсе җитәкчесе Эльвира Әхмәтова журналистларны республикадагы демография мәсьәләре белән таныштырды. Ул билгеләп үткәнчә, төбәктә гаилә кыйммәтләре һәм күпбалалы гаилә модасын күтәрү кирәк.
«Узган гасырның 80нче еллар азагында балалар туу саны нык арткан, Татарстанда 70 меңнән артык бала дөньяга аваз салган булган. Аннан соң исә саннар төрле, бер күтәрелә, бер төшә. Ә икенче тапкыр туучылар саны арту 2015 елга туры килә. Без 2015 ел саннарын төп нигез итеп алып, аларны анализлап эшлибез. Әлбәттә, соңгы елларны чагыштырганда әллә ни үзгәреш күренми. Әлбәттә, төбәктә гаилә кыйммәтләре һәм күп балалы гаилә модасын күтәрү кирәк. ТР гаиләләренә әлеге вакытта 61 төр социаль ярдәм чарасы күрсәтелә», – диде Эльвира Әхмәтова.
Җитәкче ассызыклавынча, 61 төр социаль ярдәм чарасының 9 ы федераль казна хисабыннан.
«Гаилә мәсьәләсен статистика саннары белән генә әйтеп булмый. Чынлыкта, гаиләдә низагның кайчан тууын читтән торып әйтеп булмый. Аерылышырга дип озак вакыт аңлашмаучанлыклар белән яшәгән гаиләләр дә килә. Шуңа күрә, ЗАГСка аерылышырга килгәндә генә гаиләне саклап калу мөмкин түгел. Гаилә институты проблемаларын алданрак күреп алып, гаилә белән алданрак бу җәһәттән эш башларга кирәк», – дип сөйләде ул.
Шулай ук Эльвира Әхмәтова белдерүенчә, хәзерге көндә өйләнешкән парларның 18 проценты гына, өйләнешкән елны ук бала туу таныклыгын теркәргә килә.
«Яшь буынга гаилә кыйммәтләрен аңлату һәм пропагандалау мөһим. Бу эш ЗАГСларда гына түгел, ведомствоара итеп башкарылырга тиеш. Министрлыклар бердәмлектә эш алып барганда гына нәтиҗәләргә ирешү мөмкин. Хәзер бездә генә түгел, Россия күләмендә һәм чит илләрдә дә шундый тенденция китте: яшь кызлар-егетләр мөстәкыйльлеккә омтыла. Белем алалар, финанс иминлекләрен кайгырталар һәм шуннан соң гына бала мәсьәләсенә тукталалар. Әлбәттә, 20-30 ел элекке тарихка кайтсак, яшьләр иртә өйләнешкән, беренче елны ук балалары туу очраклары да күбрәк булган», – дип билгеләде ул.