Эльмира Кәлимуллина: Татар милләтенең бер илчесе булу - минем өчен зур җаваплылык
Татарстанның атказанган артисты Эльмира Кәлимуллина иҗаты, туган телне саклау юллары турындагы фикерләре белән уртаклашты.
«Быел минем рус телендә дә бик күп җырларым чыкты, төрле проектларда катнаштым. Федераль телеканалларда да еш күрендем. Гастрольләр белән хәтта Чукоткага кадәр барып җиттек, Төркиядә симфоник оркестр белән 2 концерт та куйдык. Минем өчен боларның барысы да – зур бәхет. Үз иҗатымны бөтен илгә таратып, шул ук вакытта татар милләтенең, сәнгатенең, мәдәниятенең бер илчесе булып чыгу – минем өчен зур шатлык та, җаваплылык та.
Иң мөһиме – телеңне яратырга кирәк. Шул мәхәббәт балага да табигый рәвештә күчә. Әлбәттә, бала белән даими аралашырга кирәк. Без – ике милләтле гаилә. Мин улым белән һәрвакыт татарча гына сөйләшәм, ирем – рус телендә. Телләрне бутамыйбыз, шуңа күрә бала да аларны аерып үсә. Минем телемә, милләтемә булган мәхәббәтем улымда да барлыкка килде. Кайда гына булсам да, татарча сөйләшә белгән кешеләр булса, һәрвакыт: «Улым белән татарча гына сөйләшегез», – дип үтенәм. Балалар бакчасында да шулай. Ул рус төркеменә йөри, әмма анда татар телен белгән тәрбиячеләр бар. Мин алардан да гел: «Зинһар, татарча гына сөйләшегез», – дип сорыйм», – ди ул.
Эльмира Кәлимуллина белән «Интертат» сайты өчен Милена Новикова сөйләште.
