Эльмира Кәлимуллина белән Эльмир Низамов моноопера чыгарырга хыялланалар
Татарстанның атказанган артисты Эльмира Кәлимуллинаның концерт туры 15 мартта Казанда башлана.
(Казан, 27 февраль, «Татар-информ», Рузилә Мөхәммәтова). Эльмира Кәлимуллина белән Эльмир Низамов моноопера чыгарырга хыялланалар. Бу хакта алар бүген «Татар-информ»да үткәрелгән матбугат конференциясендә әйттеләр. Матбугат конференциясе Эльмира Кәлимуллинаның яңа концерт программасына багышланган иде.
“Эльмира өчен моноопера язу идеясе күптән бар. Без бу турыда хыялланабыз. Без әлегә материал эзлибез. Ул Сөембикә темасы да булырга мөмкин, башка сюжетка корылуы да бар”, - диде Эльмир Низамов.
Эльмира Кәлимуллинаның яңа концерт программасында Эльмир Низамов җырлары да бар. Алар бергәләп Мәскәүдә дә, Парижда да концертлар куйдылар.
- Татарстанның атказанган артисты Эльмира Кәлимуллинаның концерт туры 15 мартта Казанда башлана һәм 21 мартта туган шәһәре Түбән Камада тәмамлана. 17 мартта җырчы Чаллыда һәм 20 мартта Әлмәттә чыгыш ясаячак.