Эльмира Галимова: Сайлау участоклары янындагы концертлар – патриотизм тәрбияләү ысулы

Тавыш бирү көнендә сайлау участоклары янында бәйрәм концертлары уздыру традициясен кайтару үсеп килүче буында патриотизм һәм гражданлык җаваплылыгы тәрбияләүнең нәтиҗәле ысулы булып тора. Мондый фикерне ТР Фәннәр академиясенең Татар энциклопедиясе һәм төбәкне өйрәнү институты директоры, композитор Эльмира Галимова бүген Казанда узган «АгитБригада-80» чыгышларын ишарәләгәндә белдерде.

Галимова, сайлау участогына килгәч, концерт программасын күреп куанган. Ул әлеге күренеш аның совет чорындагы җылы хатирәләрен яңартуын әйтте. Ул чакларда мондый практика бөтен җирдә күзәтелә иде, диде ул.

«Мин балачагымны хәтерлим. Без, укучылар, бу көнгә әзерләнә идек, номерлар, шигырьләр, җырлар, биюләр өйрәнә идек. Сайлау участокларына килүчеләр безнең концертны бик теләп карый иде, шуңа күрә бу минем хәтеремдә шулкадәр якты булып сакланган», - дип сөйләде Эльмира Галимова.

Соңгы елларда мондый традиция онытылды, аны яңадан кайтару зур мәгънәгә ия, дип ассызыклады ул шулай ук. Галимова фикеренчә, балаларның мондый вакыйгаларда катнашуы яки бәйрәм концертларын каравы аларда балачактан ук җәмгыять һәм республика тормышында катнашу хисе тәрбияли.

«Бу – чыннан да, патриотизм һәм республикага, Туган илгә мәхәббәт тәрбияләү ысулларының берсе. Шуңа күрә бу бик дөрес, дип уйлыйм. Сайлау көне – ул безнең киләчәгебез. Шуңа күрә балаларны да балачактан ук иҗтимагый тормышта катнаштырып үстерергә кирәк», - дип белдерде институт директоры.

Эльмира Галимова мондый практиканы киңәйтергә һәм тавыш бирү көнендә һәр мәктәп каршында бәйрәм программалары үткәрергә кирәк, дип саный. Аның сүзләренчә, бу сайлауларның киләчәкне хәл итә торган бәйрәм булуын һәм һәр гражданинның үз тавышы белән республика үсешенә өлеш кертүен аңлауны формалаштырырга ярдәм итә.

Бүген, 14 сентябрьдә, Татарстанда Бердәм тавыш бирү көне уза. Республика халкы Татарстан Рәисен сайлый. Шулай ук 18нче номерлы Мәләкәс округы буенча Дәүләт Советы депутаты һәм 7,5 меңнән артык муниципаль депутат сайлана.

Татарстан Рәисен сайлауларда дүрт кандидат катнаша (алфавит тәртибендә): Рөстәм Миңнеханов («Бердәм Россия»), Хафиз Миргалимов (КПРФ), Виталий Смирнов («Социаль гаделлек өчен Россия пенсионерлар партиясе») һәм Руслан Йосыпов (ЛДПР).

Муниципаль сайлауларда катнашучыларның рекордлы саны теркәлгән – 11,4 меңнән артык кандидат. Алар арасында төп партияләр вәкилләре һәм үз-үзен тәкъдим итүче буларак катнашучы 2,6 меңнән артык кеше.

Татарстанда тавыш бирү өчен 2752 участок ачылды. Участоклар 7:00 сәгатьтән 20:00 сәгатькә кадәр эшләячәк.

«ТНВ-Татарстан» һәм «ТНВ-Планета» телеканалларында 14 сәгатьлек «Мин яратам сине, Татарстан!» телемарафоны уза. Ул 22:00 сәгатькә тәмамланачак.

Эфирда сайлау участокларыннан репортажлар күрсәтелә. Студиядә экспертлар, сәясәтчеләр һәм артистлар чыгыш ясый. Шулай ук «Татарстан Алга» фотоконкурсына йомгак ясала – эфирда 2 Sollers ST8 автомобиле һәм 11 iPhone 16 смартфоны уйнатыла.