«Елмай» балалар паркында брейкинг һәм soul dance буенча ачык мастер-класслар узачак
Казанда 19 сентябрьдә «Елмай» балалар паркында бию буенча ачык мастер-класслар сериясе узачак. Дәресләрне профессиональ биюче, Action man crew брейк-данс командасы катнашучысы һәм In Action мәктәбе тренеры Эдуард Хәбибуллин үткәрәчәк. Бу хакта Казан мэриясе матбугат хезмәте хәбәр итте.
Беренче булып брейкинг буенча мастер-класс узачак. Ул 15:00 сәгатьтән 15:45 сәгатькә кадәр дәвам итәчәк. Катнашучылар хип-хоп культурасы белән танышачак, җылыну өчен күнегүләр ясаячак, төп адымнарны һәм бию комбинацияләрен өйрәнәчәк. Дәрес бию джемы белән тәмамланачак.
16:05 сәгатьтән 16:50 сәгатькә кадәр казанлыларны soul dance мастер-классына көтәләр. Катнашучылар 1990 елгы музыкага диско һәм фанк стилендә хәрәкәтләр ясарга өйрәнәчәк. Ахырда катнашучылар хәрәкәтләрне бер комбинациягә берләштерәчәк һәм флешмоб оештырачак.
Катнашу өчен алдан язылырга кирәк.