Хәвеф-хәтәр 25 сентябрь 2017 20:03

Ел башыннан Татарстанда тимер юлларны кичү урыннарында 4 һәлакәт булган

Россия тимер юлларында билгеләп үткәнчә, юл-транспорт һәлакәтенең күпчелеге машина йөртүчеләр гаебе белән килеп чыккан.

Скопировать ссылку

(Казан, 25 сентябрь, "Татар-информ", Лариса Хамидшина). Ел башыннан Татарстанда тимер юлларны кичү урыннарында поезд һәм машиналар бәрелешкән 4 һәлакәт була. Аларның бөтенесе дә машина йөртүчеләр гаебе белән килеп чыга, дип сөйләде "Татар-информ"да узган матбугат конференциясендә Горький тимер юллар оешмасының Казан территориаль идарәсенең башлыгы урынбасары Александр Черемнов. Шул ук вакытта, узган ел белән чагыштырганда, аварияләрнең кимү тенденциясе күзәтелә, диде.

"Мин машина йөртүчеләргә мөрәҗәгать итәргә телим: тимер юлны кичү урыннарында юл йөрү кагыйдәләрен бозмагыз. Аның нәтиҗәләре бик аяныч булырга мөмкин. Үзегез, сезнең белән бергә машинада булучылар турында уйлагыз. Транспорт һәлакәте сәбәпле, пассажир яки шәһәр яны поездларында баручыларның да зыян күрүен истә тотыгыз ", — дип белдерде Черемнов.

Узган ел Татарстанда – 6, Чувашия Республикасында 2 юл-транспорт һәлакәте теркәлгән. Мари Эл республикасында быел бер авария булган, узган ел андый юл-транспорт һәлакәте теркәлмәгән.

#һәлакәт #тимер юл

Сәхифәләр

Ел башыннан Татарстанда тимер юлларны кичү урыннарында 4 һәлакәт булган