Җәзаларны үтәтү федераль хезмәтенең Татарстан буенча идарәсенә яңа башлык билгеләнде
Тиешле указга дәүләт башлыгы Владимир Путин 2020 елның 2 мартында имза куйды.
(Казан, 3 март , «Татар-информ»). Россия Президенты Владимир Путин Эдуард Хиалиевны Җәзаларны үтәтү федераль хезмәтенең Татарстан буенча идарәсе башлыгы вазифасына билгеләде. Бу хакта «Татар-информ»га ведомствоның матбугат хезмәтендә хәбәр иттеләр.
Тиешле указны дәүләт башлыгы 2020 елның 2 мартында имазалаган. Документтан күренгәнчә, элек беренче урынбасар булган һәм пенитенциар ведомство башлыгы вазифаларын вакытлыча башкаручы эчке хезмәт полковнигы Эдуард Хиалиев Россия Җәзаларны үтәтү федераль хезмәтенең Татарстан буенча башлыгы булачак.
Эдуард Хиалиев 1966 елның 10 апрелендә Мөслимдә туа. 1988 елда ул Казан югары хәрби команда-инженерлык училищесын тәмамлый һәм 1992 елга кадәр илнең Кораллы көчләрендә хезмәт итә.
1992 елдан ул Эчке эшләр министрлыгы системасында төрле вазифаларда, ә 2003 елдан җинаять-башкарма системасында хезмәт итә.
Төрле елларда Эдуард Хиалиев ТР пенитенциар ведомствосында кадрлар эше мәсьәләләрен кураторлык итте, Татарстанның җинаять-башкарма системасы учреждениеләренең оператив-эзләү эшен оештыру һәм координацияләү, шулай ук колонияләрдә һәм СИЗОда күзәтчелек оештыру, закон таләпләрен һәм суд карарларын тәэмин итү, хөкем ителгәннәрне исәпкә алу мәсьәләләре белән шөгыльләнде.
Эдуард Хиалиевның республика һәм ведомство бүләкләре бар.