Эдуард Галиев: Татарстан чаңгы спорты өчен сезон иң уңышлысы булды
Татарстан чаңгычылары бу сезонда барлыгы 62 медаль яулаган, шуның 22се – "алтын".
(Казан, 4 май, “Татар-информ”, Фәрит Салихов). Татарстанның чаңгы узышлары һәм биатлон федерациясенең сезонга йомгак ясау утырышында республиканың чаңгы узышлары буенча баш тренеры, федерациянең вице-президенты Эдуард Галиев елның Татарстан чаңгы спорты тарихында иң уңышлысы булуын билгеләп узды.
“2016 елга куелган бурыч-максатлар тулысынча үтәлде. Төрле дәрәҗәдәге турнирда республика чаңгычылары 62 медаль яулады. Шуның 22се алтын медаль, - дип сөйләде Эдуард Галиев. – Быелгы кебек уңышлы сезонның Татарстан чаңгы спорты тарихында булганы юк иде әле”.
Аерым уңышларга килгәндә, Эдуард Галиев тарафыннан Андрей Ларьковның дөнья чемпионатындагы көмеш медале, Анна Нечаевскаяның Универсиадада яулаган ике алтын медале, яшь спортчы Егор Казариновның үз яшьтәшләре арасындагы дөнья чемпионатындагы уңышлары – ике “көмеше” аталды.