Новокузнецкидагы «Чулпан» мәчетенә йөрүчеләр хәрбиләргә гуманитар ярдәм җибәрде
Новокузнецк шәһәренең «Чулпан» мәчетенә йөрүчеләр хәрбиләр өчен чираттагы гуманитар ярдәм җыеп озатты. Бу хакта Россия мөселманнары Дини җыены Үзәкләштерелгән дини оешмасы матбугат хезмәте хәбәр итә.
Дин тотучылар башлангычы һәм мәчетнең имам-хатыйбы Әнвәр Ашировның инициативасы белән хәрбиләргә иң кирәкле әйберләр тупланды һәм тапшырылды. Имам-хатыйп җыелган ярдәмне Юрга шәһәрендәге «Крылья ангелов» волонтёрлар штабы һәм «Катюша» гуманитар хәрәкәте аша юллады. Әнвәр хәзрәт, акциядә катнашучыларга мөрәҗәгать итеп, хәрбиләргә ныклык, көч-куәт һәм Җиңү белән исән-имин туган якларына кайтуларын теләде.
Бу көн иман, игелек һәм кешелеклелекнең теләсә нинди сынауларны җиңеп чыгарга көч бирүен тагын бер кат күрсәтте. Гуманитар ярдәм ул матди булышлык кына түгел, ә Ватанны саклаучыларга аларның ялгыз түгеллеген искәртеп торучы мөһим рухи терәк тә.