Чүпрәледә 45000 төп чыршы үсентесе утыртыла

Чыршы үсентеләре урын алачак мәйдан 12 гектарны тәшкил итә.

(Чүпрәле, 29 апрель, «Татар-информ», «Туган як»). Иске Чүпрәле белән Яңа Чүпрәле авыллары арасындагы чокыр-чакырлы урыннарга 45000 төп чыршы үсентесе утыртыла. Бу турыда район басмасы хәбәр итә.

Чыршы үсентеләре урын алачак мәйдан 12 гектарны тәшкил итә. Әлеге эш белән Валерий Мердюков җитәкләгән бригада шөгыльләнә. Бригада составында исә 8 кеше. «Гаилә подряды» дисәң дә ярый: Мердюковлар, Пустыниннар агалы-энеле эшлиләр.

Буа урман хуҗалыгына караган әлеге бригада үткән ел Чүпрәле районы территориясендә 50 гектар урман үсентеләре утырткан.

Ә үсентеләр урман булып җитешсен өчен бригада аларны 5 ел буена карап, тирә-янын чистартып, төбен йомшартып тора икән.

«Су сипкән чаклар да булды», — ди бригадир.

Урман утыртуның да үз технологиясе — чыршыларны утыртып бетергәннән соң, тирә-ягына тупыллар утыртып чыгасы була. Икенчеләре яшь чыршыны бераз да булса ышыклау өчен утыртыла, дип аңлаттылар.