news_header_top_970_100
16+
news_header_bot_970_100

Татарстанда сентябрь ахырына кадәр коры һәм җылы һава торышы сакланачак

Уңайлы һава шартлары төбәктә көчле көнбатыш антициклоны нәтиҗәсендә урнашты.

Татарстанда сентябрь ахырына кадәр коры һәм җылы һава торышы сакланачак
Михаил Захаров

(Казан, 25 сентябрь, «Татар-информ»). Берничә көн элек Татарстанга килгән коры һәм уртача җылы һава торышы республика территориясендә сентябрь ахырына кадәр сакланачак. Бу Татарстан Гидрометеорология үзәге хәбәр итә.

Әбиләр чуагы төбәктә көчле көнбатыш антициклоны аркасында урнашкан. Ул «Атлантиканың дымлы һава массалары континентка тирәнтен үтеп керүгә киртә була һәм безнең территориядә уңайлы һава торышын тота», — дип аңлата синоптиклар.

26 һәм 27 сентябрьдә ял көннәрендә явым-төшем булу ихтималы аз. Төнлә һава температурасы 4-9 градус, республика көнчыгышында +1дән +6 градуска кадәр була, урыны белән -1 градуска кадәр кырау төшәргә мөмкин. Көндез һава 16-22 градуска кадәр җылыначак.

Дүшәмбе, 28 сентябрьдә, төнлә һава +3тән +8 градуска кадәр, көндезге сәгатьләрдә +17дән +22 градуска кадәр җылына.

Метеорологлар сишәмбе һәм чәршәмбе, 29 һәм 30 сентябрь көннәрендә, һава торышының элеккечә коры һәм җылы булуын көтә. «<…> тәүлеклек һава температурасы күпьеллык нормалардан 2-3 градуска югарырак булыр дип фаразлана», — дип искәртә белгечләр. 

autoscroll_news_right_240_400_1
autoscroll_news_right_240_400_2
news_bot_970_100