Казанда яңа температура рекорды куелды

(Казан, 25 гыйнвар, «Татар-информ»). Бүген, 25 гыйнварда Казанда 2,7 градус җылы булды. Шулай итеп, яңа температура рекорды куелды.

Шәһәрнең Авиатөзелеш районында Казан-Сокол авиацион метеостанциясендә терекөмеш баганасы +2,7 градуска күтәрелгән. Бу турыда Татарстан Гидрометеорология һәм әйләнә-тирә мохитне күзәтү үзәге хәбәр итә.

Бу көнне элеккеге абсолют максимум 1985 елда теркәлгән. Ул вакытта Татарстан башкаласында һава температурасы +2,4 градус иде, дип хәбәр итә синоптиклар.

Гомумән, республика буенча, дүшәмбе һава температурасы -3 градустан + 3 градуска кадәр булган.

Метеороглар мәгълүматлары буенча, 26 гыйнварда төбәктә шулай ук аномаль һава торышы сакланачак.