Казанда кар яварга мөмкин

Татарстан башкаласында бу атна ахырында җылытачак.

(Казан, 23 март, «Татар-информ», Наталья Рыбакова). Казанда һава шартлары начарланырга һәм кар яварга мөмкин. Бу турыда бүген «Татар-информ» мәгълүмат агентлыгында узган матбугат конференциясендә Казан федераль университетының Метеорология, климатология һәм атмосфера экологиясе кафедрасы мөдире, профессор, география фәннәре докторы Юрий Переведенцев сөйләде.

«Циклонның атмосфера фронты белән көньяктан чыгуы көтелә. Самара өлкәсендә кар ява, моңа да әзер булырга кирәк. Атмосфера басымының югары булуы күзәтелә. Кыска вакытлы циклон якынлаша, ул көнчыгышка китәчәк. Аннары антициклон йогынтысында булачакбыз. Пәнҗешәмбедән башлап, төнлә һава температурасы нульдән түбән булачак, ә көндез җылытачак», — диде ул.

Россия Гидрометеорология һәм әйләнә-тирә мохитне күзәтү үзәге фаразлары буенча, сишәмбе төнендә Казанда 11,6 мм кар явуы көтелә, һава температурасы -5 градуска кадәр төшәчәк. 24 мартта көндез Татарстан башкаласында 2 градус җылы һәм карлы яңгыр явуы көтелә.

26 мартта көннәр җылына башлый. Көндез һава температурасы +7 градус булыр, дип көтелә. Якшәмбе, 29 мартта, көндез һава температурасының +11 градуска кадәр күтәрелүе фаразлана.