Рөстәм Миңнеханов татарстанлыларны «Экояз-2021» акциясендә катнашырга чакырды
Республика экологик акциясе 1 апрельдән 31 майга кадәр үткәрелә.
(Казан, 1 апрель, «Татар-информ»). ТР Президенты Рөстәм Миңнеханов татарстанлыларны «Экояз-2021» акциясендә катнашырга чакырды. ТР Экология һәм табигый ресурслар министрлыгының ел саен үткәрелә торган чарасы бүген, 1 апрельдә башланды.
«Өмәләрдә катнашыгыз, табигатьне көн саен саклагыз!» - дип мөрәҗәгать итте республика Президенты Instagram социаль челтәрендәге үз сәхифәсенә язылучыларга. Текст «Напарник» («Операция „Ы“ и другие приключения Шурика») киноновелласындагы өзек белән аралашып бара.
«Экояз-2021» акциясе республикада 1 апрельдән 31 майга кадәр узачак. Гомумреспублика өмәсе 24 апрельгә билгеләнгән. ТР Экология һәм табигый ресурслар министрлыгында быел әлеге акциядә 2020 елга караганда алты тапкыр күбрәк кеше катнашыр дип өметләнәләр.