Казан халкының торак-коммуналь хезмәтләр өчен бурычы 1,7 миллиард сумга җиткән
Казан халкының торак-коммуналь хезмәтләр өчен бурычы 1,7 миллиард сум тирәсе тәшкил итә. Шул ук вакытта, шәһәрнең идарәче компанияләренең ресурслар белән тәэмин итүче оешмаларга 257,7 миллион сум әҗәте бар. Казан шәһәре Башкарма комитеты җитәкчесе урынбасары Искәндәр Гыйниятуллин эшлекле дүшәмбедә шундый мәгълүматлар китерде.
Аның сүзләренчә, бу суммалар арасындагы аермага бурыч һәм пеняларны түләтү буенча системалы эш, шулай ук идарәче оешмаларның өстәмә түләүле хезмәтләрдән алынган керемнәре нәтиҗәсендә ирешелә.
Кайбер очракларда идарәче компанияләргә торак фондын карап тоту һәм эксплуатацияләү өчен каралган акчаны ресурслар белән тәэмин итүчеләр алдындагы бурычны каплау файдасына яңадан бүләргә туры килә.
«Бу, әлбәттә, йортларны карап тотуның сыйфатына тәэсир итми кала алмый һәм мәҗбүри чара булып тора», – дип искәртте Гыйниятуллин.
Ул шәһәр халкын коммуналь хезмәтләр өчен вакытында исәп-хисап ясарга өндәде.
«Казанлыларга торак-коммуналь хезмәтләр өчен вакытында түләүләрен сорап мөрәҗәгать итәсем килә. Торак-коммуналь хезмәт күрсәтүнең сыйфаты, халыкның иминлеге һәм уңайлылыгы турыдан-туры шуңа бәйле», - дип белдерде ул.
Торак фондын кышка әзерләү турында сөйләгәндә, Гыйниятуллин шулай ук проблемалы өч йортны атады. Сүз Киров районының Батыршин урамындагы 28, 30 һәм 32нче йортлар турында бара.
Спикер сүзләренчә, йортларның берсендә әзерлек чаралары әле башланмаган, ә калган икесендә җылылык белән тәэмин итүче оешманың кимчелекләре бетерелмәгән. Йортларга «Заря-27» торак-төзелеш кооперативы һәм торак милекчеләре ширкәте хезмәт күрсәтә.
Шул ук вакытта, Казан шәһәре торак фондының җылыту чорына әзерлеге 98 процент тәшкил итә. Шәһәрнең барлык күп фатирлы йортларында да диярлек җылыту системаларын юдыру һәм опрессовкалау эшләре башкарылган.