Дмитрий Песков: БРИКС саммитын Казаннан күчерү планлаштырылмый
Казан БРИКС саммитына әзерләнүен дәвам итә, Украинаның пилотсыз очкычлар белән һөҗүм итү ихтималы аркасында бу вакыйганы башка шәһәргә күчерү планлаштырылмый. Бу хакта «Маяк» радиостанциясенә Кремльнең рәсми вәкиле Дмитрий Песков белдерде, дип яза «Татар-информ».
«Юк, чараны күчерү планнары булмады. Әзерлек дәвам итә. Саммитка әзерләнәбез», - диде РФ Президентының матбугат сәркатибе.
Моңа кадәр Россия Президенты Владимир Путин БРИКС саммиты барышында Кытай Халык Республикасы Рәисе Си Цзиньпин һәм Һиндстан Премьер-министры Нарендра Моди белән аерым очрашырга планлаштыруы турында сөйләде.
БРИКСның уналтынчы саммиты Татарстан башкаласында 22-24 октябрьдә уза. Татарстан Рәисе Рөстәм Миңнеханов билгеләп үткәнчә, мондый дәрәҗәдәге вакыйганы үткәрү – республика өчен зур мәртәбә һәм җаваплылык. ТР башкаласы мэры Илсур Метшин ул көннәрдә шәһәрнең 20 меңгә якын кунакны кабул итәчәген әйтте.