Динияр Билалетдинов: Бу җәйдә "Рубин"нан тәгаен китәчәкмен
Казан командасы тренерлар штабы 32 яшьлек татар футболчысын бу сезонда бер тапкыр да уенга чыгармады.
Скопировать ссылку
(Казан, 6 май, "Татар-информ"). Казанның "Рубин" футбол командасы ярымсакчысы, Динияр Билалетдинов киләсе сезонга клуб белән килешүне озайтырга җыенмый. Бу хакта футболчы ТАСС агентлыгына җиткергән.
2016-2017 елгы сезон төгәлләнү белән Динияр Билалетдиновның клуб белән гамәлдәге килешүенең вакыты чыга. Исегездә булса, клубның спорт директоры Илгиз Фәхриев кыш көне үк: "Динияр Билалетдиновка башка клуб эзләдек, кызганычка каршы, табылмады. Майда аның "Рубин" белән килешү вакыты чыга һәм без аны озайтырга җыенмыйбыз. Ул – тәҗрибәле футболчы, үзенә башка команда эзли һәм бу мәсьәләдә проблема туарга тиеш түгел", – дип белдергән иде.
"Әлегә үземнең киләчәгем турында әйтергә әзер түгелмен, барысын да җәй җиткәч белерсез. Кызыклы тәкъдимнәр бар. "Рубин"да калу ихтималымы? Тәгаен калмаячакмын", – дигән Динияр Билалетдинов.
Кышкы җыеннарга төп состав белән алсалар да, Казан командасы тренерлар штабы 32 яшьлек татар футболчысын бу сезонда бер тапкыр да уенга чыгармады. Шунысын да әйтергә кирәк: узган җәйдә команда белән җыеннарда катнаштырмаудан зарланып, клуб җитәкчелегенә шикаять хаты язган 11 футболчы арасында Динияр Билалетдинов та бар иде. Соңрак клуб моны командага басым ясау, дигән гариза белән чыкты.