Динард Гатауллин: Районнарда бал алу күләме - узган елдагыдан әллә ни ким түгел
Соңгы елларда умартачылык тармагына игътибар бермә-бер артты. Моңа 2 ел элек ТР Авыл хуҗалыгы һәм азык-төлек министрлыгында барлыкка килгән Умартачылык һәм аквакультура секторы да зур йогынты ясады. ТР Авыл хуҗалыгы һәм азык-төлек министрлыгының Умартачылык һәм аквакультура секторы мөдире Динард Гатауллин быелгы уңыш турында сөйләде.
Менә соңгы алган оператив мәгълүматларга караганда, районнарыбызда бал алу күләме – былтыргы сезон белән чагыштырганда, әллә ни ким түгел, әле кайбер якларда күбрәк тә әле. Мин менә шундыйрак анализ ясадым: республиканың төньяк төбәкләрендә урнашкан хуҗалыкларда балның күләме узган елгыдан артыграк. Мисал итеп Арчаны, Балтачны китерәм. Узган елгы бал җитештерү статистикасына күз салсак, Татарстан умартачылары 3,17 тонна бал җитештерде. Россия күләмендә җитештерелгән балның 5 ярым процентын тәшкил итә ул. Әлеге вакытта бал җыю дәвам итә, мониторинг нәтиҗәләре сентябрь айларында билгеле була, гадәттә.
Балга һәм балчылык продуктларына бәяләрне базар икътисады көйли. Әгәр дә, балның күләме базар киштәләренә күбрәк чыгарылса, әлбәттә, ул арзанаюга барачак. Ә бал аз булып, кулланучы ихтыяҗы зур булса, хаклар үсәчәк. Хәзерге вакытта исә районнардан алынган мәгълүмат белән танышсак, безнең бик күп якларда 3 литрлы банка бал 1500-2000 сумга сатыла. Кайбер җирлекләрдә хәтта ки 2500-2600 сумга саталар, андый яклар да юк түгел. Иң кыйммәтлесе – юкә балы, 1 кг – 600 сум чамасыннан ким түгел.
Иң күп бал кортлары асраган районнарны атап узу да дөрес булыр. Иң күбе Арчада – 7600 баш умарта бар, аннан соң Мамадышта, Азнакайда, Нурлатта һәм Балык Бистәсендә.
Умартачылар белән «Интертат» сайты өчен Юлай Низаев сөйләште.
