"Динамо-Казан" волейболчылары ярымфинал сериясен җиңелүдән башлады
25 мартта чит мәйданда узачак матчта Ришат Гыйләҗетдинов шәкертләренә җиңү генә кирәк.
(Казан, 20 март, "Татар-информ", Фәрит Салихов). "Динамо-Казан" хатын-кызлар волейбол командасы Россия чемпионатының ярымфиналында үз мәйданында "Уралочка-НТМК" кызлары белән очрашты. Уен кунаклар файдасына төгәлләнде – 3:2.
Ярымфинал сериясе кайсы да булса команданың ике матчта җиңүенә кадәр дәвам итә. Шуңа да аерым уенның ничә партиягә сузылуы мөһим түгел. Данлыклы тренер Николай Карполь җитәкләгән "Уралочка-НТМК" командасы кызлары шуны аңлап, Казандагы уенда азакка кадәр көрәш алып барды һәм җиңүгә дә иреште. Ә бит беренче ике партияне җиңү белән төгәлләгәч "Динамо-Казан" командасына матчта җиңү яулау өчен бер генә адым ясыйсы калган иде.
Бу урында шунысын да әйтергә кирәк: узган елгы сезонда "Дүртлек финалы"нда "Динамо-Казан" нәкъ менә "Уралочка-НТМК" кызларына оттырып, финалга уза алмаган, ахыр чиктә соңгы 5 елда беренче тапкыр медальсез калган иде. Инде шул җиңелү өчен үч кайтарырга теләсә, "Динамо-Казан" командасына 25 мартта Түбән Тагилда узачак икенче матчта җиңү генә кирәк.