"Динамо-Казан" волейболчылары Төркиядә "Галатасарай" командасына оттырды
Европа волейбол конфедерацияләре кубогының финалына чыгу өчен, Казан командасына үз мәйданындагы җавап матчында җиңәргә кирәк.
(Казан, 29 март, "Татар-информ", Фәрит Салихов). "Динамо-Казан" хатын-кызлар волейбол командасы Европа волейбол конфедерацияләре (ЕКВ) кубогы ярышларының ярымфиналында Истанбулда "Галатасарай" клубына оттырды – 0:3.
Төркиядәге уенга Казан командасы өч көн элек ил чемпионаты кысаларында Түбән Тагилда "Уралочка-НТМК" командасына каршы уздырган авыр матчтан соң китте. Көндәш җитди иде: хәтерләсәгез, "Галатасарай" узган елгы сезонда әлеге турнирның финалына кадәр барып җитеп, Краснодарның "Динамо" командасына гына оттырды. Хәер, 36 команда катнашкан турнирның ярымфиналына кадәр көчсез командалар барып та җитә алмас иде шул инде.
"Динамо-Казан" кичәге матчның беренче ике партиясендә генә җитди каршылык күрсәтә алды. Хәтта икенче партиядә җиңүгә якынрак та торган иде. Әмма мәйдан хуҗаларына бу көнне диварларлар да булышты кебек.