"Динамо-Казан" волейболчылары Сербия клубыннан өстен чыкты
Европа волейбол конфедерациясе кубогы ярышларының ярымфиналына узу өчен Казан кызларына читтәге уенда да сынатмаска кирәк.
(Казан, 8 март, "Татар-информ", Фәрит Салихов). "Динамо-Казан" хатын-кызлар волейбол командасы Европа волейбол конфедерациясе (ЕКВ) кубогы ярышларының 1/4 финал раунды беренче матчында Сербиянең "Визура" клубыннан өстен чыкты – 3:0.
Белград командасы чагыштырмача яшь волейболчылардан тупланса да, аларның инде өч сезон Чемпионнар лигасында чыгыш ясау тәҗрибәсе бар. Дөрес, Казанның "Санкт-Петербург" волейбол үзәгендә узган матчта алар "Динамо-Казанга бер партиядә генә җитди каршылык күрсәтә алды. Шулай да үзләрендәге җавап очрашуында көчле каршылык тудыра алачакларына ышаналар.
"Динамо-Казан" – бик яхшы команда. Алар югары дәрәҗәдә уен күрсәтте. Безне җылы каршы алган тамашачыларга да рәхмәт. Уен аларга да ошагандыр. Кызганыч, уенда ялгышларыбыз күп булды, халыкара уен тәҗрибәсе дә җитми. Шулай да "Динамо-Казан" командасына каршы уйнарга, җиңәргә дә була. Икенче партиядә, мәсәлән, без үз дәрәҗәбездәге уен күрсәтә алдык. Бераз гына тәҗрибә җитмәде. Белградта барлык көчне эшкә җигеп, җиңәргә тиешбез", – диде "Визура"ның баш тренеры Йовица Цветкович.