Дин әһелләре форумында татар телен саклау мәсьәләсе күтәреләчәк
"Без милли тормышыбызны, динебезне бергә үреп барган очракта гына халкыбызның язмышы, киләчәге турында сүз йөртә алабыз”, - диде Данис Шакиров.
(Казан, 16 июль, “Татар-информ”, Назлыгөл Мәсәлимова). 16 июльдә “Татар-информ”да узган матбугат конференциясендә Изге Болгар җыенында Дин әһелләре форумында татар теле мәсьәләсе күтәреләчәге турында әйтелде.
“Әлбәттә, бу мәсьәлә Дин әһелләре форумында күтәреләчәк. Без секция утырышларына Ш.Мәрҗәнинең 200 еллыгы уңаеннан үткәрелеп килүче чаралар рәтенә Дин әһелләре форумын юкка гына кертмәдек. Иң беренче чиратта, безнең бөек мәгърифәтчебез, дин әһеле, фикер иясе үзенең хезмәтләрендә әлеге мәсьәләне яктырткан”, - диде Бөтендөнья татар конгрессы Башкарма комитеты җитәкчесенең урынбасары Данис Шакиров.
Шулай ук аерым дискуссион мәйданчыкларда да тел буенча фикер алышулар булачак. Ул гомум резолюциядә дә чагылышын табачак. “Бу форумны юкка гына милли тормыш һәм дин дип атамадык. Без милли тормышыбызны, динебезне бергә үреп барган очракта гына халкыбызның язмышы, киләчәге турында сүз йөртә алабыз”, - диде ул.