Депутатлар Казанда урман-парк яшел поясын булдыру тәкъдиме белән килеште
Казанда 3 266,14 га мәйданда урман-парк булдыру күздә тотыла.
(Казан, 24 декабрь, «Татар-информ», Гөлнар Гарифуллина). Бүген ТР Дәүләт Советы утырышында Казанда урман-парк яшел поясын булдыру мәсьәләсе каралды. Аның буенча Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев чыгыш ясады.
«Әйләнә-тирә мохитне саклау турында» федераль закон нигезендә гражданнарның әйләнә-тирә мохиткә хокукларын тормышка ашыру максатларында, урман-парк яшел пояслар булдырылырга мөмкин. Бу — табигатьтән чикле режимда файдалану зоналары.
Урман-парк поясын булдыру турында Дәүләт Советына Татарстанның Иҗтимагый палатасыннан материаллар килеп ирешкән. Алар нигезендә, барлыгы 3 266,14 га мәйданда урман-парк поясын булдыру күздә тотыла.
Азат Хамаевның яшел пояс булдыру турында фикерен депутатлар хуплады.