Демограф арттырылган ана капиталын ничек алырга мөмкин булуы турында сөйләде
2026 елның 1 февраленнән соң ана капиталы сорап мөрәҗәгать итүчеләр, хәтта бала бу датага кадәр туган булса да, индексацияләнгән түләү алачак. Бу хакта РФ Президенты каршындагы РАНХиГС Демография, миграция һәм хезмәт базарын тикшерү лабораториясе мөдире Алла Макаренцева сөйләде, дип хәбәр итә ТАСС.
«Ана капиталы күләме баланың туган көне белән түгел, ә гаиләнең сертификат сорап мөрәҗәгать итү датасы белән билгеләнә», – дип ассызыклады белгеч.
Мисал итеп демограф бала 31 гыйнварда туган, ә ана капиталын алуга гариза 1 февральдән соң бирелгән гаиләне китерде.
Мондый тәртип актуаль социаль-икътисади шартларны исәпкә алырга мөмкинлек бирә һәм ярдәм чараларын алучылар өчен тигез кагыйдәләр тәэмин итә, дип аңлатты Макаренцева.
Февральдә түләү күләме инфляция дәрәҗәсенә индексацияләнәчәк - 6,8 процент. Беренче бала туганда түләү 737,2 мең сумга кадәр артачак. Әгәр беренче бала өчен түләү алынмаган булса, икенче балага ана капиталы 974,1 мең сумга кадәр үсәчәк. Ә алынган булса, 236,9 мең сум тәшкил итәчәк.
Ана капиталы программасы ким дигәндә 2030 елга кадәр гамәлдә булачак.