Декабрьдә Татарстанга кош гриппы белән зарарланган дүрт партия продукция кайтарылган

Вируслы продукция Чиләбе, Пенза, Мәскәү өлкәләреннән һәм Мордовиядән китерелгән.

Скопировать ссылку

(Казан, 14 декабрь, «Татар-информ», Гөлнар Гарифуллина). Быел декабрь аенда Татарстанга түбән патологияле кош гриппы белән йогышланган дүрт партия продукция кайтарылган. Бу хакта ТР Дәүләт Советында Экология, табигатьтән файдалану, агросәнәгать һәм азык-төлек сәясәте комитеты утырышында билгеле булды.

ТР Министрлар Кабинетының Баш ветеринария идарәсе башлыгы Алмаз Хисаметдинов сүзләренчә, вируслы продукция Чиләбе өлкәсеннән («Равис- Сосновская кошчылык фабрикасы» ҖЧҖ), Пенза өлкәсеннән («Васильево кошчылык фабрикасы» һәм «ПензаМолИнвест» ҖЧҖ), Мордовия («Васильево» кошчылык фабрикасы), Мәскәү өлкәсеннән («Сафрина» сәүдә йорты) китерелгән.

«Республикада кошчылык продукциясе кайда күпләп кертелүен тикшерәбез. Ел башыннан кош гриппын китереп чыгара торган геном булу-булмавын ачыклау өчен 6 мең проба тикшерелде. Без кош гриппы белән йогышланган продукцияне гел ачыклап торабыз. Җентекләп тикшерәбез, кире җибәрәбез, кайчак яндырабыз, эшкәртүгә дә җибәрәбез», — диде Алмаз Хисаметдинов.

Ул Пенза өлкәсеннән йогышлы продукция еш ачыкланганын әйтте. «Хәзер алар продукция белән тәэминатны туктатты. Үзләре дә нигә шулай килеп чыкканын аңламый, тикшерәләр», — диде ведомство башлыгы.

Алмаз Хисаметдинов әйтүенчә, түбән патологияле кош гриппы булган продукция куркынычсыз түгел, чөнки вирус кулай шартларда үзгәрүчән булырга мөмкин. Ул, шулай ук, мондый продукцияне болай гына сатып булмаганлыгын, ә эшкәртү өчен аерым бер шартлар кирәклеген ассызыклады.

#кош гриппы

Сәхифәләр

Декабрьдә Татарстанга кош гриппы белән зарарланган дүрт партия продукция кайтарылган