Россия Шанхай Оешмасы Уеннары кысаларында 10 спорт төре буенча ярышларны кабул итәчәк
Россия 2026 елга планлаштырылган Шанхай Хезмәттәшлек Оешмасы илләре Уеннарын уздыру мәйданчыкларының берсе булачак. Илдә спортның ун төре буенча ярышлар узачак.
РФ спорт министры Михаил Дегтярев турнирга әзерлек турында хәбәр итте. Аның сүзләренчә, оешмада әгъза булып торган дәүләтләрнең профильле ведомстволары вәкилләре киңәшмәсендә махсус эшче төркем төзелгән, ул спорт багланышларын координацияләячәк.
«Шанхай Хезмәттәшлек Оешмасында әгъза булып торган илләрнең спорт министрлыклары һәм ведомстволары киңәшмәсендә без спорт буенча эшче төркемне расладык. Бу - даими эшләүче орган, ул спортка кагылышлы барлык эшчәнлекне координацияләячәк», - дип белдерде Дегтярев.
«Шанхай Хезмәттәшлек Оешмасы Уеннарын уздыру регламенты да әзер. Ярышлар ел дәвамында төрле илләрдә узачак. Россия спортның 10 төре буенча 10 старт кабул итәчәк», – дип язган министр Телеграм-каналында.