Дәүләт медицина учреждениеләре хезмәткәрләре хезмәт хакы окладының база өлеше арта
Татарстанда республика башкарма хакимият органнары карамагындагы медицина оешмалары һәм ТР Сәламәтлек саклау министрлыгы карамагындагы аерым типлы булмаган учреждениеләр хезмәткәрләренә хезмәт хакын түләү шартлары үзгәртелде.
Төбәк Министрлар кабинеты карарын ТР Премьер-министры вазифаларын башкаручы Рөстәм Нигъмәтуллин имзалады. Үзгәрешләр 2012 елның 25 апрелендә чыккан документка кертелә.
Медицина һәм фармацевтика хезмәткәрләре, социаль хезмәткәрләр, экспертлар, тикшеренүчеләр, эшче һәм хезмәткәрләрнең хезмәт хакы окладының база өлеше 3963 сумга арттырыла. Шул ук вакытта ветеринар табиблар хезмәт хакы окладының база өлеше 3457 сумга арта.
Медицина учреждениеләре педагогик һәм мәдәният хезмәткәрләре хезмәт хакы окладының база өлеше күпкә артмый, шул ук вакытта аларның артуы дифференциальләштерелгәнрәк килеп чыга. Мәсәлән, хезмәт буенча инструкторның хезмәт хакы оклады 2343 сумга, логопедныкы — 2602 сумга, мәдәни оештыручыныкы — 3663 сумга, ә китапханәченеке — 1463 сумга артачак.
Дәүләт медицина учреждениеләре (стационарлардан алып инфекцион хастаханәләргә кадәр) җитәкчеләре хезмәт хакы окладының база өлеше 6 мең сумга арттырыла.
Моннан тыш, урта, урта махсус һәм югары белемле кайбер категория хезмәткәрләр хезмәт хакы окладының база өлеше арасындагы аерма бетерелә. Шулай ук дәүләт һәм ведомство бүләкләре өчен түләүләрне исәпләү кагыйдәләре үзгәртелә.
ТР Министрлар кабинеты карары агымдагы елның 1 июленнән үз көченә керә.