Дәүләт Думасы депутаты Айрат Фәррахов «Мәскәү татарлары» клубы президенты итеп сайланды
Россия Дәүләт Думасы депутаты Айрат Фәрраховны берләшмә әгъзалары очрашуында «Мәскәү татарлары» клубы президенты итеп сайладылар. Бу хакта Татарстанның Россия Федерациясендәге Вәкаләтле вәкиллеге матбугат хезмәте хәбәр итә.
«Минем өчен Вәкаләтле вәкиллек – Татарстанның Мәскәүдәге бер кисәге. Бу – бердәмлекне ныгыта торган организм. Безнең клуб үзара очрашу, аралашу, бер-береңә ярдәм күрсәтү максатыннан оештырылган. Һәркайсыгызның гаять зур тәҗрибәсе бар», - дип искәртте Айрат Фәррахов очрашуда.
Хәбәр ителгәнчә, «Мәскәү татарлары» клубы Россия фән һәм югары белем министры урынбасары Айрат Гатиятов һәм Яшьләр эшләре буенча федераль агентлык җитәкчесенең элеккеге урынбасары Дамир Фәттахов инициативасы белән 2023 елның декабрендә оештырыла. Аның составына түрәләр, теге яки бу өлкәдә уңышка ирешкән җитәкчеләр һәм эшкуарлар кергән.