Дания Заһидуллина Шәриф Камал премиясе ияләре турында: Иҗатлары матур, бай, үзенчәлекле

Филология фәннәре докторы, профессор, Татарстан Фәннәр академиясе академигы Дания Заһидуллина Татарстан Республикасы Милли музее филиалы – Татар китабы йортында Шәриф Камал исемендәге бишенче әдәби премия тантанасында катнашты. Ул әлеге премиягә ия булучыларның иҗатларын бәяләде.

«Әлеге премиягә дәгъва итүчеләрнең әсәрләре белән танышкан вакытта күтәренке хисләр кичерәм. Әдәбиятыбыз өметле, аның киләчәге бар, талантлы яшьләрнең күп икәнлеген тагын бер тапкыр раслап, шатланып, кайтып китәбез. Бу яшьләрнең иҗаты шулай ук матур, бай һәм үзенчәлекле. Әдәби әсәрләр ягыннан мин аны эксперименталь әсәрләр конкурсы дип атар идем», - диде ул «Татар-информ»га.

Ул конкурста һәр елны милли тематикага игътибар ителүен әйтте. «Яшүсмерләрне кызыксындырган темаларга күп языла, шул ук вакытта быелгы конкурста әсәрләрнең форма ягыннан төрле булуы мине гаҗәпләндерде. Тел, сөйләмнең матурлыгы, чисталыгы, образлылык ягыннан да аерым бер мактап үтәсем килә», - диде галимә.

«Шәриф Камал исемендәге премия һәр елны үзенчәлекләр белән гаҗәпләндерә. Бер яктан, беренче дүрт елда барган ярышта күп кенә балалар ел саен катнашып килде. Аларның стиль, тема ягыннан төрлеләнүен карап, «карале, тагын килгән икән», - дип, алар өчен шатланып тордык. Быел бишенче тапкыр үткәрелгән конкурста буыннар алмашынуын күрдем. Дүрт ел буена катнашкан кешеләр бу конкурстан киткән, алар инде яшь язучылар исемлегенә кергән», - диде Дания Заһидуллина.

Галимә «Шәриф Камал. Әдәби проза» номинациясендә Әмирхан Еникинең тууы турындагы «Әмирхан» повестен, Илнар Фатыйховның татар милләтенең язмышын кораб белән тиңләп язган хикәясен укып гаҗәпләнгән. «Энҗе Фарсыеваның ирек турындагы фәлсәфи уйланулары мине яңа киңлекләргә алып чыкты. Зөләйха Камалованың илһам көче турындагы кыска язмасы башка төрле әдәби әсәр тудыру буларак сокландырды», - диде ул.

«Балалар һәм яшүсмерләр әдәбияты» номинациясендә, мәсәлән, Алинә Шиһабетдинованың әкиятләрен кечкенә китап буларак бастырып чыгарырга киңәш итәм. Ул аны балалар психологиясенә якын итеп, кызыклы язган. Балаларыбыз, оныкларыбызга гаҗәеп бер бүләк булыр иде дип, гаҗәпләнеп укыдым. Шул рәвешле һәр әсәр, һәр катнашучы турында фикер әйтергә мөмкин», - диде филология фәннәре докторы.

Дания Заһидуллина Шәриф Камалны психологик проза, хикәя остасы булганын искәртте. «Милләт язмышын кайгыртып, шул гамь белән яшәгән язучы, оста каләм иясенең премиясен алу, катнашу - тормышта бер этап буларак кабул ителәдер. Вакыйгада катнашу да - сезнең сәләтле булуыгыз, шул сәләтне үстерергә мөмкинлегегез булуы турында сөйли. Әлеге премия - таяну ноктасы булып тора. Ул сезне зур әдәбиятка алып килсен, иҗатыгызга шатланып, сөенеп яшәргә насыйп булсын, иҗат итүдән туктамагыз», - дип теләде ул.