Данис Шакиров Киров өлкәсендә Бөтенроссия авыл Сабантуен уздыру турында сөйләште
Бүген, 3 апрель көнне, Бөтендөнья татар конгрессы Башкарма комитеты җитәкчесе, Татарстан Республикасы Дәүләт Советы депутаты Данис Шакиров Киров өлкәсе Хөкүмәте Рәисенең беренче урынбасары Алексей Жердев белән очрашты. Очрашу кысаларында алар XV Бөтенроссия авыл Сабантуена әзерлек һәм аны уздыруның төп аспектлары турында фикер алыштылар. Бу хакта Бөтендөнья татар конгрессы матбугат хезмәте хәбәр итә.
2025 елда Бөтенроссия авыл Сабантуе 27-28 июньдә Киров өлкәсенең Нократ Аланы районында узачак. Бәйрәмнең ике көнлек программасына ярминкә, мастер-класслар, концертлар, гастрономия зонасы керә. Чаралар милли традицияләрнең төрлелеген һәм үзенчәлеклеген күрсәтергә, авылның һәм авыл хуҗалыгының ролен ассызыкларга юнәлдерелгән.