news_header_top_970_100
16+
news_header_bot_970_100

Данил Садриев россиялеләр арасында Олимпиадада зур трамплинда югары нәтиҗә күрсәтте

Лениногорскидан унсигез яшьлек спортчы 259,7 балл җыйды — бу Россия спортчылары арасындагы иң югары нәтиҗә.

(Казан, 13 февраль, «Татар-информ», Дамир Садриев). Татарстан спортчысы Данил Садриев Пекиндагы Олимпия уеннарында HS-140 зур трамплиннан сикерү ярышларының финал раундында 16 нчы урынны алды.

Лениногорскидан унсигез яшьлек спортчы 259,7 балл җыйды — бу Россия спортчылары арасындагы иң югары нәтиҗә. Зур трамплинда алтын медальне норвегияле Мариус Линдвик (296,1 балл) яулады, көмешне — Япония спортчысы Рею Кобаяси (292,8), ә бронза медаль немец Карл Гайгерга (281,3 балл) эләкте.

Чаңгыда трамплиннан сикерү. Зур трамплин.

1. Мариус Линдвик (Норвегия) — 296,1.

2. Рею Кобаяси (Япония) — 292,9.

3. Карл Гайгер (Германия) — 281,3.

16. Данил Садриев (Россия) — 259,7.

Шунысын да билгеләп үтәргә кирәк, Садриев ераклык буенча (136,5 метр) квалификациядә бишенче нәтиҗә күрсәтте.

Элегрәк «Татар-информ» мәгълүмат агентлыгының спорт редакциясе Данил Садриевның балачагы турында язган иде. Моннан тыш, агентлык спортчы белән аралашты, ул команда турнирында көмеш медаль яулаганнан соңгы хис-кичерешләре белән уртаклашты.

autoscroll_news_right_240_400_1
autoscroll_news_right_240_400_2
news_bot_970_100