Дамир Йосыпов самолетны кырга утырту вакыйгасы турында фильм төшереләчәген әйтте
Россия Герое фильм төшерелгәндә консультацияләр бирәчәк.
(Казан, 8 октябрь, «Татар-информ», Зилә Мөбәрәкшина). Россия Герое, Мәскәү өлкәсендә двигателе сүнгән самолетны кукуруз басуына утырта алган очучы Дамир Йосыпов шул вакыйгаларга бәйле фильм төшереләчәген әйткән.
«Мәскәү өлкәсендә кукуруз кырына А321 очкычын утырту белән бәйле вакыйгалар турында тулы метражлы нәфис фильм төшерә башлаячаклар. Минем белән танылган кинокомпания элемтәгә керде һәм без бу идеяне тормышка ашырырга карар кылдык. Мин консультант вазифасында булам. Фильмны 2022 елның җәендә төшерә башлыйлар. Калганы турында соңрак хәбәр итәрмен», — дигән ул инстаграм битендә.
Россия Президенты Владимир Путин 2019 елның 22 ноябрендә «Урал авиалинияләре» пилотлары Дамир Йосыпов һәм Георгий Мурзинга Россия Геройларының алтын медальләрен тапшырды. 2019 елның август аенда алар бортында 226 пассажир булган Airbus А321 лайнерын Мәскәү өлкәсендә кукуруз басуына төшереп утыртты.