Җәмгыять 11 декабрь 2014 13:01

Дүрт татарстанлы югары дәүләт бүләкләренә лаек булган

Әйтик, ТР авыл хуҗалыгы һәм азык-төлек министры Марат Әхмәтов "РФ атказанган авыл хуҗалыгы хезмәткәре"дигән мактаулы исем алган

Скопировать ссылку

(Казан, 11 декабрь, «Татар-информ»). Түбән Новгород ярминкәсендә РФ Президентының Идел буе федераль округындагы Тулы вәкаләтле вәкиле Михаил Бабич ИФО кешеләренә дәүләт бүләкләрен тапшырды. Татарстанның да дүрт вәкиле югары дәүләт бүләкләренә лаек булды.

Бүләкләнүчеләр арасында - Мари Иле, Татарстан, Чувашстан, Пермь крае, Түбән Новгород, Пенза, Самара, Сарытау һәм Ульяновск өлкәләреннән 21 вәкил. Аларның барысы да мәгариф һәм фән, сәламәтлек саклау һәм мәдәният, сәнәгый җитештерү, энергетика комплексы, социаль өлкә, авыл хуҗалыгы, Гаддәттән тыш хәлләр министрлыгы структураларында хезмәт куя.

Татарстан вәкилләре дүрт дәүләт бүләген алды. Әйтик, ТР авыл хуҗалыгы һәм азык-төлек министры Марат Әхмәтов "РФның атказанган авыл хуҗалыгы хезмәткәре" дигән мактаулы исемгә лаек булды.

Казан илкүләм тикшеренү технологик университеты профессоры, техник фәннәр докторы Любовь Зенитова га "РФның югары мәктәбенең атказанган хезмәткәре" исеме бирелде.

ТР "Медицина университеты клиникасы" баш табибы Рәис Хәбиров "РФның атказанган табибы" булды.

Ә ТР Министрлар Кабинеты Аппаратының Төзелеш, транспорт, торак-коммуналь һәм юл хуҗалыгы идарәсе башлыгы Илдар Сибгатуллинга Россия Президентының Рәхмәте белдерелде, дип хәбәр итә РФ Президентының Идел буе федераль округындагы Тулы вәкаләтле вәкиле матбугат хезмәте.

Сәхифәләр

Дүрт татарстанлы югары дәүләт бүләкләренә лаек булган