Рәсми Татарстан 10 сентябрь 2014 09:22

Дөньяда әйдәп баручы полимер җитештерүчеләрнең берсе Татарстанда үз производствосын ачу белән кызыксына

Бүген бу хакта ТР Президенты Рөстәм Миңнеханов белән очрашуда әлеге компания вәкилләре белдерде

Скопировать ссылку

(Казан, 10 сентябрь, «Татар-информ»). Дөньяда әйдәп баручы полимер җитештерүчеләрнең берсе - Сингапурның "Indorama" төркеме Татарстанда производство булдыру белән кызыксына. Бу хакта бүген әлеге компания вәкилләре ТР Президенты Рөстәм Миңнеханов белән Сингапурда узган очрашу барышында белдерде. Очрашуда шулай ук ТР Президентының халыкара мәсьәләләр буенча ярдәмчесе Радик Гыйматдинов, ТР Инвестицияләр үсеше агентлыгы җитәкчесе Линар Якупов катнашты.

Очрашу барышында компания вәкилләре "Indorama" төркеменең дөньяның 23 илендә 56 нефть һәм газ-химия җитештерүче предприятиеләре булуы хакында сөйләде. Төркем бер елга 10 млн. тонна төрле продукция җитештерергә сәләтле.

"Indorama"ның Россиядә заводлары юк, әмма, компания вәкилләре сүзләренчә, ул элеккеге СССР илләре, шул исәптән РФда үз производствосын ачу белән кызыксына.

Татарстан Президенты Рөстәм Миңнеханов, үз чиратында, хәзерге вакытта республикада елына 1,2 млн. тонна этилен һәм 1,4 млн. тонна пластмасса җитештерелүне әйтте. "Без бу саннарны тагын да арттырырга телибез. Әгәр сез бу процессларда катнашырга телисез икән, без хезмәттәшлеккә әзер", - дип ассызыклады Р.Миңнеханов.

Ул "Indorama" вәкилләренә республикага хезмәттәшлек турында җентекле тәкъдимнәр җибәрергә киңәш итте, ул чакта Татарстан да республиканың чимал, транспорт инфраструктурасы һәм башка мәсьәләләр буенча үз мөмкинлекләрен тәкъдим итә алыр иде, дип хәбәр итә ТР Президенты матбугат хезмәте.

"Сез - бик җитди компания, һәм без уртак мәнфәгатьләр таба алсак яхшы булыр иде", - диде Рөстәм Миңнеханов "Indorama" вәкилләренә очрашу азагында.

Сәхифәләр

Дөньяда әйдәп баручы полимер җитештерүчеләрнең берсе Татарстанда үз производствосын ачу белән кызыксына