Дөнья чемпионаты илчесе Эльмира Кәлимуллина футболчы Месси белән очрашырга хыяллана
Җырчы мондый бәхет тәтесә, һичшиксез, бу хакта балаларына сөйләячәген әйтте.
(Казан, 27 июнь, “Татар-информ”, Гөлнар Гарифуллина). Дөнья чемпионаты илчесе, җырчы Эльмира Кәлимуллина Аргентина җыелмасы өчен уйнаучы танылган футбол остасы Лионель Месси белән очрашу турында хыяллана. Бу хакта ул бүген IT- паркта Дөнья чемпионатының шәһәр матбугат үзәгендә әйтте.
“Беләсезме, иртән генә шул хакта уйланган идем. Месси белән очрашырга тәкъдим итсәләр, ә миңа берәр җиргә очарга кирәк булса, мин китми калыр идем. Чөнки бу вакыйга турында балаларга да сөйләргә була. Бу бәхет тәтесә, һичшиксез, балаларга сөйләячәкмен”, - ди җырчы.
Эльмира Кәлимуллина Чемпионатның Россиядә узуы үзе үк зур вакыйга булуын әйтте. “Хәтта футболдан күпкә ерак булган әни дә кичә минем белән футбол карады”, - диде ул.
Җырчы 30 июньдә Чемпионат финалының 1/8 өлешендә Казанда уйнаячак Аргентина һәм Франция командалары матчын түземсезлек белән көтүен әйтте.