Авыл 9 март 2017 17:18

Дәүләт ярдәме беренче чиратта фермерларга бирелә – Нәҗип Хаҗипов

Бу бездә язылмаган канун, ди тармак министры урынбасары.

Скопировать ссылку

(Казан, 9 март, "Татар-информ", Лилия Локманова). Бүген Татарстан Авыл хуҗалыгы һәм азык-төлек министрлыгы бинасында VI Бөтенроссия эшмәкәрләре җыенының терлекчелек һәм кошчылык юнәлешендә эш алып баручылар өчен дискуссия мәйданчыгы эшләде. Анда тармак министры урынбасары Нәҗип Хаҗипов катнашты.

Чарага Бөтендөнья Татар конгрессы Башкарма комитеты әгъзасы Фәрит Уразаев рәислек итте.

"Калининградтан алып Ерак Көнчыгышка кадәр милләттәшләребезнең актив булуы бик сөендерә. Форумда барлыгы 700 кеше катнаша, шуларның 600е Россиянең төрле төбәкләреннән, башкалары исә Татарстаннан. Проблема гади түгел. Ашлык үстерүме, терлек асраумы – барысы да авыр бирелә. Сәбәбе гади – илдәге яшәеш халәтенең безгә күчүе", – диде ул.

Мәгълүм булганча, Татарстанда 2016 елда 484,3 мең тонна ит, 1770,4 мең тонна сөт җитештерелгән. Соңгысының 1207,6 мең тоннасы шәхси ярдәмче хуҗалыкларга һәм крестьян-фермер хуҗалыкларына туры килә.

"Бездә дәүләт ярдәмен һәрчак беренче булып крестьян-фермер хуҗалары ала, инвесторлар бераз көтеп тора. Бу бездә - язылмаган канун", – диде Нәҗип Хаҗипов, делегатларны Татарстанда шәхси ярдәмче хуҗалыклар һәм крестьян-фермер хуҗалыклары эшчәнлеге белән таныштырып.

Соңыннан форум делегатлары үзләре шөгыльләнә торган эшмәкәрлек юнәлешләре белән таныштырды.

#Авыл хуҗалыгы #эшмәкәрлек #Бөтендөнья татар конгрессы #Эшмәкәрләр җыены

Сәхифәләр

Дәүләт ярдәме беренче чиратта фермерларга бирелә – Нәҗип Хаҗипов