Җәмгыять 21 сентябрь 2016 13:38

Дәүләт хезмәткәрләренең түләүле яллары кыскартылды

Бу дәүләт граждан хезмәте вазифаларын биләүчеләргә кагыла.

Скопировать ссылку

(Казан, 21 сентябрь, “Татар-информ”, Лилия Локманова). Дәүләт граждан хезмәте вазифаларын биләүче хезмәткәрләрнең еллык төп түләүле яллары 35 календарь көненннән 30 календарь көненә кадәр кыскартыла. Бу хакта бүген V чакырылыш Дәүләт Советының 21 нче утырышында мәгълүм булды.

Татарстан парламентының Дәүләт корылышы һәм җирле үзидарә комитеты җитәкчесе Альберт Хәбибуллин тәкъдим иткән закон проекты нигезендә, барлык дәүләт граждан хезмәткәрләре өчен түләүле ялны исәпләү тәртибенә үзгәрешләр кертелә. Хәзер аларның яллары эш стажына бәйле рәвештә һәр ел саен бер календарь көн исәбеннән исәпләүне күздә тота. Моннан соң, дәүләт граждан хезмәте стажы 15 ел яисә аннан да күбрәк булганда максималь дәвамлылыкта — 10 календарь көн итеп бирелә.

Тагын бер үзгәреш нормалаштырылмаган хезмәт көне өчен бирелә торган еллык өстәмә түләүле ялга кагыла. Альберт Хәбибуллин тәкъдим иткән закон проекты нигезендә, мондый ял дәвамлылыгы коллектив шартнамә яисә дәүләт органнарының хезмәт тәртибе буенча түгел, ә “Татарстан Республикасы дәүләт граждан хезмәте турында” Татарстан законы нигезендә билгеләнә һәм 3 календарь көнне тәшкил итә.

#Альберт Хәбибуллин #дәүләт хезмәткәрләре

Сәхифәләр

Дәүләт хезмәткәрләренең түләүле яллары кыскартылды