Чүпрәледә уҗымнарны һәм күпьеллык үләннәрне тукландыруга керештеләр
«Чүпрәле Рассвет Агро» җәмгыяте хезмәтчәннәре районда беренчеләрдән булып уҗымнарны һәм күпьеллык үләннәрне тукландыруга кереште. Бу хакта «Туган як» газетасы яза.
Бүгенге көнгә хуҗалыкта 1350 гектар мәйданда ашлама кертелгән, шул исәптән 800 гектарда күпьеллык үләннәр, 400 гектарда көзге рапс, 150 гектарда көзге бодай культуралары тукландырылган. Кырларда 5 берәмлек техника эшли.
«Чүпрәле Рассвет Агро» җәмгыяте директоры урынбасары Алексей Храмов сүзләренә караганда, алар көзге рапс һәм бодайга ашлама кертүгә 12 марттан керешкәннәр. Бүгенге көндә кырларда 5 «Туман» агрегат-сиптергече эшли.
Соңгы көннәрдә «Цильна» җәмгыятендә дә көзге культураларны һәм күпьеллык үләннәрне тукландыруга керештеләр, диелә хәбәрдә.