Быел «Уйнагыз, гармуннар!» фестивале 35нче тапкыр үткәрелә
Фестивальдә барлыгы 600 гармунчы катнашкан.
(Казан, 30 август, «Татар-информ», Алинә Айдарова). Бүген Казанда Галиәсгар Камал исемендәге академия театры каршындагы мәйданда «Уйнагыз, гармуннар!» флешмобы башланып китте. Быел «Уйнагыз, гармуннар!» фестивале 35нче тапкыр үткәрелә.
Фестивальдә барлыгы 600 гармунчы катнашкан, дип хәбәр итә оештыручылар. Гармунчылар флешмоб рәвешендә Камал театры мәйданыннан Спас манарасына барачак.
Фестиваль кысаларында йөз оста гармунчы билгеләнгән. Йөз җиңүченең һәммәсенә дә гармун бүләк ителгән.
Тамашада Татарстанның халык артистлары Гүзәл Уразова, Зәйнәб Фәрхетдинова, Хәмдүнә Тимергалиева, Рөстәм Закиров, Татарстанның атказанган артисты Ришат Төхвәтуллин һәм башкалар катнашачак.
Шулай ук Татарстанның Дәүләт җыр һәм бию ансамбле да биредә. Тамашаны Алсу Каюмова, Илдар Кыямов алып бара.