Казан халкына «Хәзинә» музыкаль-хореография перформансын күрсәтәләр

Тамаша Камал театры янында узачак.

(Казан, 26 сентябрь, «Татар-информ»). 26 сентябрьдә Кабан күле яр буенда Татарстан башкаласы халкы һәм кунаклары «Хәзинә» музыкаль-хореография перформансын карый алачак. Бу хакта Иҗтимагый киңлекнең «Инстаграм»ында хәбәр ителә.

«Бу кичтә өч музыкант һәм өч биюче Кабан күле серен музыка, тавыш һәм бию аша ачарга тырышачак», — диелә хәбәрдә.

Тамаша перкуссионист Эрик Марковский, Тувадан башкаручы Сугдэр Лудуп, музыкант Анна Благовой, хореограф-куючы һәм «Азатлык мәйданы» заманча хореография фестиваленең арт-директоры Венера Галимова, «Пантера» камера балеты артисткасы, хореограф-куючы, «Бәхетле станциясе» хореография коллективы җитәкчесе Аида Шәйхетдинова һәм педагог, хореограф-куючы Ксения Чичерова катнашында узачак.

Чара Камал театры янында була. Тамаша кичке сәгать җидедә башлана.