Туган тел һәм Тукай туган көнгә багышланган тантаналар быел яңа форматта була
Быел татар шигърияте классигы, публицист һәм җәмәгать эшлеклесе Габдулла Тукайның тууына 134 ел тула.
(Казан, 25 апрель, «Татар-информ»). Үз-үзеңне изоляцияләү режимында булу таләп ителү сәбәпле, 26 апрельдә Габдулла Тукайның туган көне һәм Туган тел көнендә бәйрәм форматы үзгәрә. 12.00 сәгатьтә «Татарстан-Яңа Гасыр» телеканалында бәйрәм фильм-концерты күрсәтеләчәк. Концерт барышында 2020 елда Тукай премиясе лауреатлары игълан ителә. Бу турыда Татарстан Мәдәният министрлыгы матбугат хезмәте хәбәр итте.
Татарстан Республикасы Язучылар берлеге тарафыннан ел саен үткәрелә торган Шигърият бәйрәме быел үзенең масштабларын киңәйтә. Социаль челтәрләрдә (Вконтакте, Фейсбук, инстаграм) флешмоб оештырылачак, анда танылган шагыйрьләр, язучылар, Габдулла Тукай Азәрбайҗан, Үзбәкстан һ.б.), катнаша алачак. Бөек шагыйрьнең шигырьләре бу көнне төрле телләрдә яңгыраячак.
26 апрельдә нәкъ көн уртасында башланачак акциягә барлык теләүчеләр дә кушыла ала. Моның өчен яраткан шигырьне укып, аны видеога яздырырга, роликны #шигырьбәйрәмеһәм#Тукайтуганкөн# Праздникпоэзиионлайн #ДеньрожденияТукая хештегы белән үз аккаунтыңда урнаштырырга кирәк.
Моннан тыш, бәйрәмгә Татарстан мәдәният учреждениеләре дә зур тематик онлайн-программа әзерли. Шул рәвешле, К.Тинчурин исемендәге Татар дәүләт драма һәм комедия театры артистлары үзләрнең YouTube — каналында һәм учреждениенең социаль челтәрләрдәге аккаунтларында Тукай шигырьләрен укый. Акция ахырында актерлар «Туган тел» җырын башкарачак.
Шигъри флешмоблар һәм марафоннар «Әкият» курчак театрының, Татарстан Республикасы Милли музее һәм Г.Тукай әдәби музееның социаль челтәрләрендә дә старт ала. Композитор Н.Г.Җиһанов музееның YouTube-каналында һәм социаль челтәрләрендә «Нәҗип Җиһанов иҗатында Габдулла Тукай әсәрләре» программасы булачак.
Татар әдәбияты тарихы музее һәм Шәриф Камал мемориаль фатиры — Татар китабы йорты белән рәсми Instagram-аккаунтының туры эфирында Тукайның иҗатын өйрәнүчеләр, тәнкыйтьчеләр, Г.Тукай премиясенең 2020 елгы лауреатлары, хәзерге заман язучылары белән видеоконференция һәм фикер алышу оештыра. Шулай ук Г.Тукайның тормышы һәм иҗаты буенча «Без белгән һәм белмәгән Тукай» онлайн-квестын үткәрү планлаштырыла.