Булачак хәрбиләргә файдалы киңәшләр

(Казан, 24 февраль, «Татар-информ», Рәсилә Кәримова). Бүген Казанның Үзәкләштерелгән китапханәләр системасында (ҮКС) медицина фәннәре кандидаты, Үпкә авыруларын дәвалау диспансерының баш табибы Рәшит Җәләлиевнең «Дембель – котылгысыз» («Дембель- неизбежен») дип исемләнгән китабын тәкъдир итү булды. Әлеге чарада шәһәрнең 96 нчы санлы мәктәп укучылары да катнашты.

Китап егетләр өчен махсус атап язылган. Автор китапта үзенең хәрби хезмәттәге тәҗрибәләреннән чыгып, бүгенге көндә армиягә алынганнар өчен киңәшләр бирә. Күләме ягыннан кечкенә булса да, анда яшь солдатлар өчен шактый файдалы киңәшләр китерелгән. Китап ахырында беренче ашыгыч ярдәм күрсәтү буенча да мәгълүмат урнаштырылган.

Тәкъдир итү кичәсе бик күңелле үтте. Төрле истәлекләр белән бергә, анда Эмиль Җәләлетдинов башкаруында җырлар да яңгырады.