Башкортстанда Аксаков көннәре булып үтте

Башкортстанда узган атна азагында халыкара Аксаков көннәре булып үтте
(Уфа, 23 сентябрь, “Татар-информ”, Фәнис Фәтхуллин). Башкортстанда узган атна азагында халыкара Аксаков көннәре булып үтте.
Җомга көнне үк башланган бу бәйрәм чаралары якшәмбе көнне Уфада тәмамланды. Тантаналар шулай ук Бәләбәй, Кырмыскалы һәм Уфа районнарында да оештырылды. Бәйрәмдә катнашу өчен, Болгариядән, Белоруссиядән, шулай ук Мәскәү, Новосибирск, Рязань, Ырымбур шәһәрләреннән, башка төбәкләрдән күп кунаклар да килде.
XVIII Халыкара Аксаков бәйрәме кысаларындагы мәдәни чаралар быел тагын да эчтәлеклерәк булды. Аның бай мәдәни программасына йөзләрчә сәнгатькәрләр, язучылар, шагыйрьләр, журналистлар һәм әдәбият сөючеләр җәлеп ителгән иде.
Бәйрәмнең тәүге көне Уфада Аксаков укулары белән башланып китте. Чарада татар һәм башкорт әдипләре дә катнашты.
Бәйрәм чаралары шул ук көнне Уфаның Шакша бистәсендә дә оештырылды. Нәкъ менә шундагы Касыйм авылында Сергей Аксаковның бабасының йорт-җирләре булган. Төштән соң бәйрәмдә катнашучылар һәм чит төбәкләрдән килгән кунаклар Аксаков мәктәп-гимназиясенә килде һәм анда ачык дәресләрдәге мәдәни чараларда булды.
Аксаков бәйрәме шимбә һәм якшәмбе көннәрендә Бәләбәй һәм Кырмыскалы районнарында дәвам итте. Анда кунаклар, һәр елдагыча, Аксаков шифаханәсендә һәм Надеждино авылындагы тарихи-мәдәни үзәктә фольклор бәйрәмендә катнашты. Бәйрәм чаралары Уфа янындагы Зубово авылында да оештырылды. Анда Сергей Аксаковның бабасының биләмәләрендә фольклор төркемнәре зур концерт күрсәтте.
Башкортстан дәүләт опера һәм балет театрында узган тантанада исә президент Мортаза Рәхимов Аксаков бүләгенең быелгы ияләренә бүләкләр тапшырды. Быел бу абруйлы бүләккә язучылар Талха Гыйниятуллин белән Станислав Куняев лаек булды.