«Казан» бию ансамбле өр-яңа программа әзерли

(Казан, 19 сентябрь, «Татар-информ», Рәсилә Кәримова). Бу көннәрдә «Казан» милли үзәге каршында эшләп килүче «Казан» бию ансамбле өр-яңа программа әзерли. «Казан сөлгесе» дип исемләнгән әлеге программа тиздән сәхнәгә чыгачак.

«Программаны тулысынча әйтеп бирмибез,- ди «Казан» милли-мәдәни үзәге директоры Исхак Усманов. –Ул тамашачылар өчен серле бүләк булып калсын».

Ансамбльнең яңалыклары бу гына түгел. Быел әлеге бию труппасы коллективы барлыгы кырык кешегә арткан. Моннан тыш балалар һәм үсмерләр коллективы да булдырылган. Бу исә киләчәк буында югары зәвык тәрбияләү һәм аларның буш вакытларын нәтиҗәле уздыру максатыннан оештырылган. Ул гына да түгел, бирегә йөрүче балалар һәм үсмерләр алга таба зурлар труппасына алмаш булыр.