Татарстанда 2024 елга кадәр Сара Садыйковага ике һәйкәл куярга планлаштыралар
Бер скульптура Казанда Татарстан һәм Тукай урамнары чатында, икенчесе Биектау районының Олыяз авылында урнаштырылачак.
(Казан, 19 август, «Татар-информ», Марат Ишкилдин). Татарстанда 2024 елга кадәр татар җырчысы, композитор һәм актриса Сара Садыйковага ике һәйкәл куярга ниятлиләр.Тиешле карарны Татарстан Премьер-министры Алексей Песошин имзалады.
Халык һәйкәлләр кую өчен җыеннарда тавыш бирде.
«ТР муниципаль берәмлекләрендә гражданнар җыеннары һәм VI чакырылыш ТР Дәүләт Советы депутатларын сайлау кампаниясе барышында «Минем депутат» онлайн-сервисы һәм «Мобиль кабул итү» проекты аша кергән мәсьәләләрне хәл итү буенча 2020 - 2024 елларга чаралар комплексын («юл картасын») расларга», – диелә документта.
Беренче скульптураны Биектау районы башкарма комитеты Олыяз авылында 2022 елда урнаштырырга тиеш.
Икенче һәйкәлне Казан башкарма комитеты Татарстан һәм Тукай урамнары чатында 2024 елда урнаштырачак.